MAYNILA — Patay ang isang lalaking sinasabing lider ng isang grupo ng mga kriminal matapos makipagbarilan sa mga umaarestong pulis sa lungsod na ito, sabi ngayong Martes ng mga awtoridad.
Ayon sa Manila Police District (MPD), magsisilbi sana sila ng arrest warrant para sa kasong murder laban kay Rommel Tiatco, 20, sa bahay nito sa Tondo district.
Pero nagpaputok umano ng baril ang suspek na nauwi sa engkuwentro.
Itinakbo pa sa ospital si Tiatco pero idineklara ring dead on arrival.
Si Tiatco ay lider umano ng crime group na dawit sa mga basag-kotse at holdapan sa Metro Manila at mga karatig-probinsiya, sabi ni MPD Director Brig. Gen. Leo Francisco.
Siya rin umano ang suspek sa pagpatay sa pulis-Maynila na si Danreb Cipriano noong Oktubre 15, 2020 sa Tondo.
Narekober ang baril na ginamit ng suspek.
Patuloy naman umano ang pagtugis ng mga awtoridad sa ibang miyembro ng grupo ni Tiatco. -- Ulat ni Jerome Lantin, ABS-CBN News
No comments:
Post a Comment