Saturday, February 6, 2021
Lalaki pinatay sa loob ng bahay sa QC
Patay ang isang lalaki matapos pagbabarilin sa loob ng kaniyang bahay sa Batasan Hills, Quezon City, Biyernes ng gabi.
Nakilala ang biktima na si si Luis Valero.
Sa kuwento ng asawa ng biktima na si Tessie, natutulog sila bandang alas-11 ng gabi sa ikalawang palapag ng kanilang bahay sa may Presidential Road nang biglang pumasok ang tatlong lalaki at ginising ang kaniyang mister.
Nakita niya na kinaladkad ng mga lalaki ang kaniyang mister pababa ng bahay. Makalipas ng ilang minuto, nakarinig na siya ng maraming putok ng baril.
Pagbaba niya ng bahay, patay na ang mister.
Ayon sa kaniya, walang kaaway ang mister at lumalabas lang ng bahay para magtrabaho kung saan-saan para may makain lang sila.
Ayon naman sa kapatid ng biktima na sa Regina Abrigo, dati nang nakulong ang biktima dahil sa droga. Pero hindi naman daw totoo ang paratang dahil planted lang ang droga noon. Wala daw kinalaman ang kapatid niya sa kahit anong ilegal na gawain.
Inaalam na ng pulis ang pagkakakilanlan ng mga suspek at kung ano ang motibo sa krimen.
https://news.abs-cbn.com/news/02/06/21/lalaki-pinatay-sa-loob-ng-bahay-sa-qc