Pamilya ng 5, naospital matapos masunog ang tirahan sa Makati

Isinugod sa pagamutan ang 5 miyembro ng isang pamilya matapos masunog ang tinitirhan nilang unit sa gusali sa Barangay Tejeros, Makati City Miyerkoles.

Sa ulat ng Bureau of Fire Protection - National Capital Region (BFP-NCR), sumiklab ang sunog sa ground floor ng Building 2 ng Bliss housing sa H. Santos Street bago mag-ala-1:30 ng madaling-araw.

Kuwento ng kapitbahay na si Judy Penera, nakarinig sila ng pumutok sa sala ng unit ng pamilya Parrenas bago nakita ang apoy at napalikas sila.

Pero dagdag niya, hindi agad nakalabas ang nakatirang pamilya dahil naharang na ang pinto ng apoy.

Itinaas ang unang alarma at napigilan ang pagkalat ng apoy sa ibang unit pagdating ng mga bombero.

Naapula ang sunog makalipas ang isang oras. 

Saka na lang nailabas nang isa-isa ang mag-asawang sina Edelberg, 32, at Charlene, 35, at ang 3 nilang anak na edad 8 (walo), 5 (lima), at 2 (dalawa). 

Kuwento ni Penera, walang malay ang karamihan sa kanila at nahirapang huminga ang isa.

Ayon sa Tejeros Fire Station, dinala ang mag-anak sa Sta. Ana Hospital sa Maynila.

Sabi ng isang kamag-anak, maayos na ang lagay ng mga magulang at 2 anak na babae pero inoobserbahan pa ang bunsong lalaki.

Isa naman sa tinitingnang sanhi ng sunog ang nakitang nakasaksak na baterya ng e-bike sa sala.

Patuloy pa ang imbestigasyon ng Makati City fire station. 

https://news.abs-cbn.com/news/02/10/21/pamilya-ng-5-naospital-matapos-masunog-ang-tirahan-sa-makati

2 umano'y kawatan, arestado sa magkahiwalay na insidente sa Makati

Arestado ang dalawang lalaki na nagnakaw umano sa magkahiwalay na insidente sa Makati Martes.

Inaresto ang isang 18 anyos na lalaki matapos pagnakawan ang isang construction site sa Barangay Bangkal. Nakita ng isang construction worker ang suspek at isang pang kasabwat na pumasok at kinuha ang ilang mga gamit gaya ng electric drill, grinder at dalawang cellphone.

Nakapagsumbong agad ang construction worker sa Bantay Bayan at nahuli ang isa sa mga suspek. Nakuha sa kaniya ang isang cellphone. Nakatakas naman ang kasabwat niya na may hawak ng iba pang nakaw na gamit.

Samantala, arestado rin ang isang merchandiser sa tangkang pagnakaw sa isang supermarket sa Barangay Carmona. 

Palabas na ang staff at i-check ng guwardiya ang kaniyang gamit, nakita na nakabalot ng jacket ang isang plastic na may kalahating kilo ng jumbo shrimps. 

Walang maipakitang resibo ang merchandiser kaya agad siyang dinala sa police station. 

Nahaharap ang lalaki sa kasong qualified theft.

https://news.abs-cbn.com/news/02/10/21/2-umanoy-kawatan-arestado-sa-magkahiwalay-na-insidente-sa-makati

2 menor de edad, natagpuang tadtad ng saksak sa Tondo

 Nagdadalamhati ang pamilya ng dalawang binatilyo na natagpuang patay sa baybayin ng Isla Puting Bato sa Tondo, Maynila.

Kinilala silang sina Carl Justine Bonogon at Chormel Buenaflor, parehong 15 anyos.

Ayon sa mga kaanak, January 31 pa nila huling nakita ang dalawa.

Dalawang araw rin nilang hinanap ang magkaibigan bago sila matagpuan sa dagat.

Naunang natagpuan ang bangkay ni Bonogon ng isang mag-uuling noong February 2 ayon sa Delpan Police Station.

Hindi siya agad nakilala ng kanyang lola dahil sa mga sugat sa mukha at katawan.

Bangkay naman ni Buenaflor ang nakitang lumulutang nang sumunod na araw.

Balot ng packaging tape ang ulo, kamay at paa ng mga biktima.

Tadtad din ng saksak ang kanilang mga katawan.

Walang maisip ang mga pamilya na posibleng gumawa ng karumal-dumal na pagpatay sa dalawang binatilyo.

Pareho silang out-of-school youth at malapit sa kanilang pamilya kaya hustisya ang panawagan ng mga naiwang kaanak.

Patuloy naman ang imbestigasyon ng pulisya sa kaso ng dalawa.

https://news.abs-cbn.com/news/02/10/21/2-menor-de-edad-natagpuang-tadtad-ng-saksak-sa-tondo