Lalaki patay sa sunog sa Makati

Joyce Balancio, ABS-CBN News

(UPDATE)—Isang 25 anyos na lalaki ang patay sa sunog na sumiklab sa Barangay Olympia sa lungsod ng Makati, Lunes ng gabi.

Ayon sa Bureau of Fire Protection, ang biktima na si Jeremiah Rizon, na may kapansanan, ay na-trap sa kaniyang kwarto sa ikalawang palapag na bahay sa San Bernardino Street. 

Ayon sa pamilya, may down syndrome si Rizon at posibleng natakot noong ma-trap sa kuwarto habang sinusubukang iligtas.

Sa bahay ng biktima rin umano nagsimula ang apoy, ayon sa BFP, bagama't iniimbestigahan pa ang naging sanhi nito. 

Naitaas ang unang alarma ng sunog bandang 7:14 ng gabi, hanggang naakyat ito hanggang ikatlong alarma bandang 7:23 p.m. 

Tuluyan namang naapula ang apoy bandang 8:15 ng gabi. 

Tinatayang nasa 18 na pamilya na nakatira sa 12 bahay ang naapektuhan ng sunog. 

Nasa P300,000 naman ang sinasabing halaga ng ari-ariang tinupok ng apoy. 

Binuksan ang barangay para matuluyan ng mga nasunugan, pero may iba naman na nakitira sa mga kamag-anak.

Nag-aalala pa rin ang ilan sa kanila sa kanilang pagbangon.--May ulat ni Anjo Bagaoisan, ABS-CBN News

https://news.abs-cbn.com/news/04/26/21/lalaki-patay-sunog-makati-apr262021

LRT-1-CAVITE EXTENSION LIVE UPDATE TODAY APRIL 26-2021

PNR Railway Update Construction

LRT 1 CAVITE EXTENSION LATEST UPDATE🇵🇭 7:10am

Sunog, sumiklab sa isang residential area sa Payatas, Quezon City

Sampung pamilya ang nawalan ng tahanan matapos tupukin ng apoy ang anim na magkakatabing bahay sa Dahlia St., Brgy. Payatas A, Quezon City.

Ayon sa Bureau of Fire Protection, nagsimula ang sunog ng 5:17 p.m. agad na itinaas sa ikalawang alarma nang 5:28 p.m. at tuluyang naapula ganap na 6:22 p.m.

Sa inisyal na imbestigasyon, lumalabas na pagwe-welding ang dahilan ng pagsiklab ng apoy sa ikalawang palapag ng bahay na pag-aari ni Felecita Villabroza. 

Nagtamo ng first degree burn ang isa sa miyembro ng pamilya na si Lauro Christopher Villabroza.

Tinataya namang aabot sa P100,000 ang halaga ng mga ari-ariang tinupok ng apoy.

https://news.abs-cbn.com/news/04/25/21/sunog-sumiklab-sa-isang-residential-area-sa-payatas-quezon-city

Mga doktor: Di pa dapat luwagan ang quarantine status sa NCR Plus

Limang araw na lang ang natitira sa modified enhanced community quarantine na ipinatupad ng pamahalaan sa Metro Manila at 4 na karatig-lalawigan pero nagkakaisa ang mga doktor na huwag munang magluwag ng lockdown restrictions dahil mataas pa rin ang bilang ng mga nagkakasakit ng COVID-19.

"The last time noong nag-ECQ (enhanced community quarantine), hindi naman siya ECQ. Hindi gaya ng ECQ like one year ago, nag-ECQ, walang katao-katao sa daanan. 'Yong nag-ECQ tayo a month ago, useless," ani Dr. Juliano Zacarias Panganiban, chair ng COVID_19 task force sa Chinese General Hospital and Medical Center.

"Mas maganda po sana kung puwedeng ma-extend nang isang linggo o dalawang linggo, 'yon po para... mas mabawasan pa po 'yong mga naka-admit dahil hanggang ngayon, puno pa rin ang aming [emergency room], puno ang [intensive care unit], marami pong hindi makapasok," sabi naman ni Dr. Jonas del Rosario, tagapagsalita ng COVID-19 referral center na Philippine General Hospital.

Noong dulo ng Marso, isinailalim sa mahigpit na ECQ ang Metro Manila, Bulacan, Cavite, Laguna at Rizal dahil sa pagsipa ng mga kaso ng COVID-19, na naging dahilan ng punuan ng mga ospital. Simula Abril 12, ibinaba ito sa mas maluwag na modified ECQ, na epektibo hanggang Abril 30.

Pero aminado naman ang ilang ospital na may improvement kahit papaano sa situwasyon.

"Last week, 'yong admissions namin, umaabot po ng 132, 128, 126. 'Yong census po kagabi, we have 109 admissions lang po. So medyo may improvement po. Bumaba po. Medyo nabawasan ng kaunti," ani San Lazaro Hospital Spokesperson Dr. Ferdinand de Guzman.

"Hindi na po kasing haba noong dati pero punuan po ang ospital. At least ngayon, mayroon kaming magagawa doon sa mga nasa emergency room," sabi naman ni Lung Center of the Philippines Spokesperson Dr. Norberto Francisco.

"Medyo bumababa po at sana tumuloy-tuloy," ani Del Rosario.

Ayon kay Health Undersecretary Leopoldo Vega, na siya ring treatment czar, unti-unti nang nag-stabilize ang health care utilization rate sa nakalipas na linggo.

Nasa 71 hanggang 73 porsiyento na ang rate nito mula sa dating 78 hanggang 80 porsiyento.

"'Yong sa ER ho, hindi na kasing congested as compared po noong pag-umpisa ho ng surge noong mga March," ani Vega.

Pero kailan nga ba masasabi na puwede nang magluwag?

Para kay Vega, dapat ay bumaba sa 3,000 hanggang 4,000 ang bagong kaso ng COVID-19 na naitatala kada araw.

Higit 9,000 ang daily average cases sa nakalipas na linggo pero bumaba na rin iyan mula sa dating halos 11,000, ayon sa Department of Health.

"Kaya kung talagang mapapansin natin na kung bababa pa 'yan, magiging 4,000 at 3,000, 'yon masasabi na natin na kayang-kaya ng ating health system capacity," ani Vega.

Sa taya ng ABS-CBN Data Analytics, mula 9,000, matagal-tagal pa bago maabot ang 3,000 hanggang 4,000 daily average cases.

"In August, naga-average tayo noon ng 4,500 cases daily. ‘Yon ang pinaka-peak natin noong 2020. Napababa natin ito to less than 2,000 consistently around November, December. So, it took around 3 to 4 months," ani Edson Guido, head ng ABS-CBN Data Analytics.

Para kay Guido, kailangan pa ring pagbutihin ng pamahalaan ang pagtugon sa pandemya ngayong napipintong lumampas na sa 1 milyon ang mga kaso ng COVID-19.

"Tayo lang 'yong pangalawang bansa sa Southeast Asia na nakalagpas ng 1 million, I think kailangan natin talagang i-improve pa rin ’yong ating pandemic response," aniya.

Iminungkahi naman ng OCTA Research Group na dagdagan ang testing sa bansa, sa 75,000 mula sa higit 50,000 na daily average testing ngayon.

Ito'y para madaling mahiwalay at matukoy ang may kaso ng COVID-19, kabilang ang mga asymptomatic o walang sintomas.

Ayon naman kay Vega, kasama sa mga hakbang para mapalakas ang health capacity ay ang pagdagdag ng ICU beds sa mga ospital, at pag-operationalize ng mga bagong tayong field hospital at isolation center.

-- Ulat ni Michael Delizo, ABS-CBN News

https://news.abs-cbn.com/news/04/25/21/mga-doktor-di-pa-dapat-luwagan-ang-quarantine-status-sa-ncr-plus

Barko iniimbestigahan sa pagpapakawala ng wastewater sa Manila Bay

April Rafales, ABS-CBN News

(UPDATE) — Iniimbestigahan ng mga awtoridad ang isang barko matapos itong magpakawala ng wastewater o maduming tubig sa Manila Bay.

Nakuhanan ng mga vlogger noong Sabado ang pagpapakawala ng barko, na itinuturing rason kung bakit naging kulay kalawang ang malaking bahagi ng Manila Bay sa may Baywalk.

"'Yong kulay niya ay 'di nagbabago, yellowish pa rin at kumakalat sa Manila Bay so posibleng mayroon itong epekto sa marine life at mismong sa ating paglilinis ng Manila Bay," ani Manila Bay Coordinating Office Deputy Executive Director Jacob Meimban.

Nitong umaga ng Linggo, kumuha ng water sample ang mga tauhan ng Manila Bay Coordinating Office kasama ang Philippine Coast Guard at Metropolitan manila Development Authority para malaman kung may halong langis ang pinakawalang wastewater.

Ayon sa oiler ng barko na si Escolastico Bunyi, ilang buwan nang nakatengga ang barko sa lugar dahil nasiraan at kailangang maiayos.

Pero itinanggi niyang may kasamang langis at pinakawalang wastewater.

"Galing din po 'yan sa ilalim, sa dagat din. Kapag pinaaandar 'yong makina dahil cooling po yan, seawater na may posibilidad na puwedeng sumipsip siya at papalabas ulit," ani Bunyi.

Ayon naman sa Department of Environment and Natural Resources, may langis man o wala, puwede pa ring managot ang may-ari ng barko sa paglabag sa Clean Water Act, na nagbabawal sa paglabas ng kahit ano'ng puwedeng sanhi ng pagkdumi ng tubig o makapipigil sa natural na daloy ng tubig.

"Dapat mayroon silang authority para permit to discharge. And at the same time, dapat mayroon din silang treatment facility within the vessel," ani Environment Undersecretary Jonas Leones.

"Kung hindi man, dapat kino-contain muna nila 'yong wastewater nila. And kung naka-dock na sila, they should have it treated before they discharge it," dagdag niya.

Naka-hold muna ang barko at oiler habang iniimbestigahan ng Coast Guard at DENR.

https://news.abs-cbn.com/news/04/25/21/barko-iniimbestigahan-sa-pagpapakawala-ng-wastewater-sa-manila-bay

'NCR bubble', mga karatig-lugar uunahin sa pamimigay ng bagong Sinovac doses

Sa high risk areas muna ipapamahagi ang mga bakuna ng Sinovac na kararating lang sa bansa ngayong Huwebes, ayon sa Department of Health (DOH). 

Ayon kay Health Undersecretary Maria Rosario Vergeire, uunahing ipamahagi ang bakuna sa "NCR Plus" bubble, at nalalabing bahagi ng Central Luzon at Calabarzon. 

May mga matatanggap naman aniyang suplay ng mga bakuna ang iba pang LGU sa mga susunod na araw. 

"Meron ho tayong bias ngayon sa ating mga lugar na matataas ang kaso dahil gusto ho natin maprotektahan maigi ang vulnerable sector dito sa mga lugar na ito. Hindi kailangan mag-alala ng ating ibang regions kasi yun pong allocations naman meron din po kayo,” ani Vergeire. 

Ayon kay Vergeire, posibleng sa Linggo, Abril 25 sisimulan ang pamamahagi nito; habang may iba pang bakunang paparating gaya ng Sputnik V na galing sa Gamaleya Institute ng Russia. 

"May kararating lang na Sinovac noong isang araw at may parating pa rin po tayo sa isang linggo na Sinovac vaccines pa rin.

Ang distribution po ah yung allocation nagawa na po... posibleng bukas mag-uumpisa tayo mag-distribute," ani Vergeire. 

Pero sinabi rin ni Vergeire na sa mga lugar na lang na kayang sundin ang storage requirements ibibigay ang Sputnik V vaccines. 

Aabot sa -18 degrees Celsius ang storage requirement ng Sputnik V, mas mababa kung ikukumpara sa Sinovac at AstraZeneca vaccines na may storage requirement na 2 hanggang 8 degrees Celsius. 

Ayon sa mga eksperto, kailangang mabakunahan ang nasa 70 porsiyento ng populasyon para maabot ang herd immunity. 

Kaya naman nagpaalala sa publiko si Philippine Foundation for Vaccination Executive Director Dr. Lulu Bravo na magpabakuna na. 

"Kapag dumating ang bakuna po magpabakuna po tayo sapagkat yan ay dumaan naman sa ekspertong pag-iimbestiga. Hindi po natin pababayaan ang ating mamayan na magkaroon ng harm. Ang bakuna ay hindi dapat makasama yan po ay upang makapagligtas ng buhay," ani Bravo. 

— Ulat ni Raya Capulong, ABS-CBN News

https://news.abs-cbn.com/news/04/24/21/ncr-bubble-mga-karatig-lugar-uunahin-sa-pamimigay-ng-bagong-sinovac-doses

ALAMIN: Bagong patakaran ng DILG, QC LGU sa mga community pantry

Nagbaba na ng panuntunan ang Department of the Interior and Local Government (DILG) tungkol sa pag-oorganisa ng mga community pantry, kasunod ng pagpanaw ng isang senior citizen na pumila sa community pantry na inorganisa ng aktres na si Angel Locsin. 

Ayon sa DILG, dapat makipag-ugnayan na muna sa mga barangay at pagsilbihan lang ang mismong komunidad para maiwasan ang dagsa ng mga tao mula sa ibang lugar. 

"Kailangan kasama ang barangay, kasama ang LGU para tulungan lahat. Hindi lang ang organizer ang kailangang tumulong, kailangan lahat. At the end of the day kailangan 'yung mga organizer must be responsible," ani DILG Undersecretary Jonathan Malaya. 

"Nasa kanila 'yung responsibility to coordinate to the barangay and the PNP (Philippine National Police) at 'yung PNP naman at 'yung barangay must respond immediately to any request for help or assistance ng ating mga organizers."

Nagbaba na rin ng sariling panuntunan ang Quezon City government sa mga community pantry. 

Una, dapat ipatupad ang minimum public health standards. Dapat ding panatilihing malinis ang lugar. Bawal ding kumain sa lugar, at dapat siguruhing malinis at sariwa ang pagkain. 

Nagtakda rin ng oras ang Quezon City para sa mga pantry - mula alas-5 ng umaga hanggang alas-8 ng gabi lang dapat ang operasyon ng mga ito, pero puwede pa itong mabago depende sa ipinapatupad na public safety hours. Ayon sa LGU, binalangkas ito kasama ang organizer ng Maginhawa community pantry na si Patricia Non. 

"Naiintindihan ko naman na kailangan i-coordinate hangga’t maaari sa barangay para maiwasan natin ‘yung insidente na hindi maganda, para merong ambulansya, may naka-standby na first aid, tapos para rin may makatulong for location," ani Non. 

Sa Maginhawa Street sa Quezon City unang umusbong ang community pantry, na ngayon ay isa nang movement na kumalat na sa iba't ibang lugar, maging sa labas ng bansa.

Ayon sa DOH, mahalagang ipatupad ng mga LGU ang minimum public health standards sa mga community pantry. 

“Sana wala pong mga matatandang lumalabas muna para mapangalagaan. Napakalaki po ng role ng local governments natin ngayon sa mga community pantries para mai-organize po nila at hindi po ito maging source ng pagkakahawa-hawa,” ani DOH Undersecretary Maria Rosario Vergeire. 

Binalangkas ang panuntunan matapos mauwi sa siksikan ang community pantry na inorganisa ng aktres na si Angel Locsin para sa kaniyang kaarawan - kung saan isang senior citizen ang pumanaw matapos himatayin. 

Humingi na ng tawad ang aktres at sinabing aakuhin niya ang responsibilidad. 

"Pasensya na po talaga alam kong wala pong papel or silbi ang paghingi ko ng tawad o pasensya dahil sa mga nangyari, pero wala na po talaga akong masabing iba kung hindi sorry lang po talaga,” ani Locsin. 

Pero ang kapitan ng barangay Holy Spirit na si Felicito Valmocina, kung saan itinayo ni Locsin ang kaniyang community pantry, galit pa rin dahil bagama’t may koordinasyon naman ang kampo ng aktres, hindi na aniya niya dapat inanunsiyo na kahit sino ang maaaring pumunta gayong limitado lang ang kaya niyang i-accomodate. 

Una nang nabanggit ni Locsin na aakuhin niya ang responsibilidad sa nangyari.  

"Kung sa tingin po nila ay malaki po ang pagkakamali ko dito, aakuin ko naman po 'yun. Hindi naman po ako magtuturo ng ibang tao kasi wala naman akong nakikitang dapat sisihin,” ani Locsin. 

Pinag-aaralan pa umano ng chairman kung mapapatunayang may kapabayaan at pagkukulang bago maghain ng kaso. 

— Ulat ni Michael Delizo, ABS-CBN News

https://news.abs-cbn.com/news/04/24/21/alamin-bagong-patakaran-ng-dilg-qc-lgu-sa-mga-community-pantry

2 patay sa sunog sa Caloocan

Jekki Pascual, ABS-CBN News

Umakyat sa dalawa ang bilang ng namatay sa sunog sa 2nd at 3rd Avenue sa Caloocan City, Biyernes ng gabi.

 

Ayon sa Bureau of Fire Protection, unang natagpuan ang bangkay ng 44 anyos na si Ronard Camacho na na-trap sa loob ng kaniyang bahay.

View this post on Instagram

A post shared by Jekki Pascual (@newspatrol)

Ang pangalawang nasawi ay ang 38-anyos na si Adonis Ventorozo na pinaniniwalaang mahina na rin ang kalusugan dahil sa sakit. Nadala pa siya sa ospital pero idineklarang dead on arrival. 

Wala namang ibang nasaktan sa insidente at nakita na ang mga unang naiulat na nawawala. 

Nawalan ng tirahan ang 20 pamilya matapos na masunog ang tinatayang 15 mga bahay. 

Inaalam pa ang sanhi ng sunog na umabot sa ikalawang alarma at naideklarang fire out alas-9:52 ng gabi.

 

Nasa P90,000 naman ang halaga ng mga ari-arian na natupok ng apoy. 

https://news.abs-cbn.com/news/04/24/21/1-patay-2-nawawala-sa-sunog-sa-caloocan