Thursday, March 18, 2021
Curfew violators sa Baclaran, pinaawit ng ‘Lupang Hinirang’
Pababa ang bilang ng mga nahuhuli sa labas ng bahay sa Parañaque City sa ikatlong gabi ng unified curfew sa Metro Manila.
Mula Miyerkules ng gabi hanggang Huwebes ng madaling-araw, dinampot ang 106 na katao at 19 menor de edad.
Curfew violators in Baclaran, Parañaque were made to sing the national anthem & squat for 30 seconds before they were sent home. pic.twitter.com/MZWTeeQmus
— Anjo Bagaoisan (@anjo_bagaoisan) March 17, 2021
Ayon sa Parañaque City Police, mas mababa ito sa 231 offenders na nahuli noong Lunes ng gabi at sa 188 kinabukasan.
Pero sa Baclaran na siyang may pinakamaraming active cases ng COVID-19 sa lungsod, dumagdag ang mga naitala nilang curfew violator.
Mula 24 noong unang gabi, naging 34 ito noong isang gabi at 39 kagabi.
Ang ikinalulungkot lang ng taga-barangay, mga residente pa ang karamihan sa mga huli imbes na mga tagalabas.
Kaya para matuto ang ilan, pinakanta sila ng pambansang awit na "Lupang Hinirang” at saka pinag-squat ng kalahating minuto para mapauwi.
Bago ito, namalagi muna sila sa barangay ng ilang oras.
Second offender naman ang 18-anyos na si “Vin" na unang nahuli noong ikalawang gabi ng curfew.
Giit niya, natiyempuhan lang siya ng mga pulis sa parehong pagkakataon.
"Pauwi na ako noon, hinihintay ko lang kasama ko. Naginuman kami sa kabilang bahay," aniya.
Minumultahan ng P1,000 para sa unang violation ang mga lumalabag sa curfew sa Parañaque.
Nadadagdagan ito ng tig-sanlibo para sa second at third violation bago humantong sa kaso.
Pero kung walang pambayad, pwede silang patawan ng detention sa barangay nang 6 na oras o higit pa kung pangalawa at pangatlong huli na.
Sabi ni Glenn Ponan ng barangay health emergency response team (BHERT), mas pinauuwi kaagad ang mga napag-alamang may sapat na dahilan kaya nasa labas, tulad ng ilang kailangan ng signal para sa online class.
May dagdag na kaso at parusa para sa mga may dagdag pang violation gaya ng nahuhuling walang suot na face mask at face shield, o kaya nag-iinuman sa labas.
https://news.abs-cbn.com/news/03/18/21/curfew-violators-sa-baclaran-pinaawit-ng-lupang-hinirang
Wednesday, March 17, 2021
Kaybiang Tunnel sa Cavite 'no tourism zone' na mula Marso 19
Bawal na ang tourism activities sa dinarayong Kaybiang Tunnel sa bayan ng Ternate simula Marso 19 dahil sa napapaulat na matinding trapiko at nakakalat na basura sa lugar bunsod ng mga dumadalaw doon.
Inanunsiyo ito ni Cavite Gov. Jonvic Remulla sa kaniyang Facebook page sa gitna ng muling pagsirit ng mga kaso ng COVID-19.
Ayon kay Remulla, pagbabawalan ang mga sumusunod:
Pagparada malapit sa tunnel
Pagdaan ng mga siklista sa tunnel para sa “leisure purposes”
Pagkain, pagtambay at pagse-selfie sa may tunnel
Pagbusina sa loob ng tunnel
Ayon kay Remulla, may mga nag-uulat sa kaniya na nagiging sanhi ng trapiko sa tunnel ang mga bisikleta, motorsiklo, at iba pang nakaparadang sasakyan. Marami kasi ang humihinto sa lugar para kumuha ng retrato.
“Buong magdamag ay libo-libong bisikleta, motorsiklo, at sasakyan ang nakaparada, kumakain, nagliliwaliw at lahat ay tumitigil para mag-selfie o mag-picture-taking doon,” ani Remulla.
"Ang resulta? Nonstop traffic at bottleneck mula entrance at exit ng tunnel. Kaya simula sa Biyernes ay strictly NO TOURISM ZONE na ang Kaybiang Tunnel," aniya.
Dagdag pa ni Remulla: “Hindi ko naman kagustuhan ang basagan ng trip. Ngunit responsibilidad ko din na siguraduhin na maayos ang counterflow ng traffic at maintenance ng law and order sa ating mga lansangan.”
Dahil din dito ay maglalagay ng police checkpoints sa Tanza, Naic, Maragondon, at Ternate.
— Ulat ni Dennis Datu, ABS-CBN News
https://news.abs-cbn.com/news/03/17/21/kaybiang-tunnel-sa-cavite-no-tourism-zone-na-mula-marso-19
Monday, March 15, 2021
Malacañang di nakikitang dapat nang maghigpit ng lockdown sa mga komunidad
Hindi pa nakikita ng Malacañang na dapat nang magpataw ng mas mahigpit na lockdown sa mga komunidad dahil sa matinding epekto nito sa ekonomiya.
Ayon kay Presidential Spokesperson Harry Roque, dapat na maging bahagi ng pang-araw-araw na pamumuhay ang pag-iingat laban sa banta ng COVID-19.
"We need to live with this virus. Sa akin po talaga, hindi po ako nasa laylayan ng lipunan pero I would imagine na 'yong mga 'no work, no pay' ay talagang nagdarasal po na sana makapagpatuloy silang magtrabaho dahil sa ngayon po wala rin tayong ayuda na nasa budget," ani Roque.
Binitiwan ni Roque ang mga pahayag sa harap ng patuloy na pagdami ng mga kaso ng COVID-19 sa bansa, kasama ang Metro Manila.
Bilang tugon na rin sa tumataas na bilang ng mga kaso, nagpatupad ang mga alkalde ng Metro Manila ng unified curfew mula alas-10 ng gabi hanggang alas-5 ng madaling araw, na sisimulang ipatupad ngayong gabi ng Lunes.
Ayon sa Philippine National Police, 9,000 pulis ang ipakakalat nila sa Metro Manila para ipatupad ang curfew.
Nasa 379 checkpoint din ang ipakakalat sa Kamaynilaan.
Tanging essential services lang umano ang exempted at kailangang magpakita ng employment ID.
COVID-19 facilities punuan na
Sa Quezon City, punuan na ang mga COVID-19 facilites na Hope 1 hanggang Hope 4, kasama ang Novaliches District Hospital, Quezon City General Hospital, at Rosario Maclang Bautista General Hospital.
Sa Rosario Maclang Bautista General Hospital, nagtayo na rin ng dagdag na tent sa labas ng ospital na magsisilbing COVID-19 wards.
Lumalabas din sa datos ng local government unit (LGU) na sa workplace o trabaho madalas nakukuha ang COVID-19, na nauuwi naman ng empleyado sa kani-kanilang mga bahay.
Dahil dito, ipinag-utos ni Mayor Joy Belmonte na silipin kung sumusunod sa health protocols ang mga opisina at iba pang workplace.
Nasa 25 lugar na sa lungsod ang naka-lockdown dahil sa dami ng active cases.
Halos puno na rin ang isolation facilities sa Pasay matapos pumalo sa 783 ang active cases.
Nagsagawa na ng malawakang COVID-19 testing ang lungsod, kasama ang 2,000 kawani ng Pasay Public Market.
Sa San Juan, sinabi naman ni Mayor Francis Zamora na 80 porsiyento na ang occupancy rate ng kanilang isolation facility.
Localized lockdown
Inanunsiyo naman ni Manila Mayor Francisco "Isko Moreno" Domagoso na isasailalim sa 4 na araw na lockdown simula Miyerkoles ang 6 na barangay sa lungsod sa harap ng patuloy na pagdami ng COVID-19 cases.
Naka-lockdown hanggang Sabado ang mga barangay 185, 374, 521, 628, 675 at 847 sa Maynila.
Sa Makati, bantay-sarado pa rin dahil nananatili sa localized enhanced community quarantine ang 8 lansangan sa Barangay Pio del Pilar.
Nakatakdang matapos ang localized lockdown sa Martes.
Pag-aaralan pa ng Makati kung kailangan ding i-lockdown ang iba pang lugar sa siyudad.
Noong Marso 13, umabot na sa 808 ang active COVID-19 cases sa Makati, pinakamarami ay galing sa Barangay Pio del Pilar na 128.
Pinag-aaralan naman ng LGU sa Malabon ang pagpapatupad ng granular lockdown kung hindi makokontrol ang pagtaas ng kaso ng COVID-19.
May 7,739 na kumpirmadong kaso sa Malabon, kung saan 652 ang active cases.
Sa Navotas, sa halip na multa, isasailalim sa mandatory RT-PCR test ang mga lalabag sa curfew at iba pang health protocols.
May 700 active cases sa Navotas.
Nagsagawa naman ng malawakang disinfection sa Pateros matapos halos dumoble ang COVID-19 cases mula noong Marso 8.
May 83 active cases ang bayan, base sa tala noong Marso 13, mula sa 44 na kaso noong Marso 8.
Naka-quarantine naman nang 2 linggo si Pasig City Mayor Vico Sotto matapos pumanaw ang kaniyang driver dahil sa COVID-19.
Ikinalungkot ni Sotto ang pagpanaw ng driver dahil matagal na daw niya itong kasama.
Sa Caloocan, na may 648 active COVID-19 cases, ipinag-utos ni Mayor Oscar Malapitan na ipatupad ang 50 porsiyentong skeletal workforce para sa mga pumapasok sa mga tanggapan ng pamahalaang lungsod.
— Ulat nina Raffy Santos, Zyann Ambrosio at Ina Reformina, ABS-CBN News
https://news.abs-cbn.com/news/03/15/21/malacaang-di-nakikitang-dapat-nang-maghigpit-ng-lockdown-sa-mga-komunidad
2 barangay sa Mamburao, Occ. Mindoro naghigpit sa lockdown
Dennis Datu, ABS-CBN News
Nasa 2 barangay sa bayan ng Mamburao, Occidental Mindoro ang isinailalim sa enhanced community quarantine (ECQ) o mas mahigpit na quarantine restrictions simula ngayong Lunes dahil sa pagtaas ng bilang ng mga tinaamaan ng COVID-19.
Nasa 78 bahay sa Barangay Payompon at Barangay 7 ang inilagay sa ECQ, na tatagal nang 15 araw, sabi ni Mayor Angeline Tria.
Dahil dito, ibinalik ang mga checkpoint at tanging may mga quarantine pass lang ang papayagang lumabas ng kanilang mga bahay.
Mahigpit ding ipatutupad ang curfew mula alas-8 ng gabi hanggang alas-4 ng madaling araw.
"Kung maaari po ay limitahan niyo po ang pagpunta ng mga tao niyo sa Mamburao proper dahil nandito ang epicenter. Dito po sa bayan ng Mamburao, puwde po kayo makakuha ng transmission ng sinasabing COVID," ani Tria.
Ayon kay Tria, mula noong Marso 3 hanggang 15, umabot sa 21 ang bagong kaso sa 2 lugar, samantalang 7 lamang ang naitala doon mula noong magsimula ang pandemya noong 2020 hanggang noong nakaraang buwan.
Higit 100 residente pa ng Mamburao ang naghihintay ng resulta ng kanilang RT-PCR test para malaman kung mayroon silang COVID-19.
Samantala, nananatili namang naka-lockdown ang Occidental Mindoro Provincial Hospital matapos magpositibo sa COVID-19 ang 11 empleyado, kabilang ang mga doktor, nurse at guwardiya.
Ayon kay Dr. Ma. Teresa Tan, provincial health officer sa Occidental Mindoro, isa sa posibleng dahilan ng pagdami ng COVID-19 cases ay ang pagluluwag ng restrictions papasok ng kanilang probinsiya.
Nasa 26 dagdag na kaso ng COVID-19 ang naitala sa probinsiya nitong Marso para sa kabuuang 294 buhat nang magsimula ang pandemya.
Pinag-aaralan na rin ng lokal na pamahalaan ang pagpapatupad muli ng mahigpit na travel restrictions papasok ng Occidental Mindoro.
https://news.abs-cbn.com/news/03/15/21/2-barangay-sa-mamburao-occ-mindoro-naghigpit-sa-lockdown
Sunday, March 14, 2021
Saturday, March 13, 2021
Babae patay sa pananaksak sa Davao del Sur; suspek arestado
Patay sa pananaksak ang isang 19 anyos na babae sa Barangay Zone 2, Digos City sa Davao del Sur, Huwebes ng hapon.
Natagpuan ang bangkay ni Xena May Cabaid sa bahay ng suspek.
Sa imbestigasyon ng pulisya, nakita ng isang saksi ang suspek na pauwi sa bahay nito na duguan.
Pinuntahan umano ng saksi ang lalaki sa kanyang bahay at napansin na lasing ito habang nakaupo sa sofa.
Ayon sa pulisya, nakita rin ng saksi ang bangkay ng biktima sa kusina ng bahay ng lalaki.
Agad na nahuli ang suspek at nakumpiska rin ang kutsilyong ginamit nito sa krimen.
Patuloy pang iniimbestigahan ng pulisya ang insidente para mabatid ang motibo sa krimen.
Isasailalim sa autopsy ang bangkay ng biktima habang inihahanda naman ang kasong kriminal laban sa suspek.
- Ulat ni Hernel Tocmo
https://news.abs-cbn.com/news/03/13/21/babae-patay-sa-pananaksak-sa-davao-del-sur-suspek-arestado
Friday, March 12, 2021
Pagpapatupad ng curfew sa Metro Manila kasado na pero may mga di natuwa
Sa darating na Lunes ay ipatutupad na sa Metro Manila ang unified curfew na aarangkada mula alas-10 ng gabi hanggang alas-5 ng umaga, na inaasahang makatulong sa pagkontrol ng pagkalat ng COVID-19.
Para sa ilang mga tao, makatutulong ang pagkakasundo ng Metro Manila mayors sa unified curfew para mabawasan ang kalituhan, lalo't iba-iba noon ang patakaran ng bawat lokal na pamahalaan.
Pero ang ilan, hindi masaya, katulad ni Aling Charito na may karinderya.
Ang regular daw kasi nilang pamamalengke ay alas-3 ng madaling araw kaya kapag may curfew ay maaantala ang kanilang pamimili at pagluluto ng almusal para sa kostumer.
"Mawawala po 'yung mga kakain ng almusal sa amin," aniya.
Umaaray din ang mga jeep at tricycle driver dahil mababawasan daw ang kanilang kita, lalo na't lumiit ito dahil sa pandemic.
Ayon kay Antonio Gomez, tricycle driver, malamang ay wala na silang makuhang pasahero sa pila ng tricycle.
"Laking epekto sa 'min na walang kita. Sana maibalik ang dati. [Pero] wala tayong magagawa, sunod na lang tayo," aniya.
Ang jeepney driver naman na si Jessy Soledad, naghahanda na sa mas maliit na kita.
"Magiging apektado kasi konti ang pasahero... Iiksi ang oras. Sa kita namin apektado din," hinaing niya.
Giit ng hepe ng Quezon City Department of Public Safety and Order, tuloy ang pagpapatupad nila ng unified curfew pero may mga exemption naman daw.
Kabilang dito ang mga nasa graveyard shift, delivery ng essential services, at iba pang maituturing na frontliners.
Dalawang linggo lang dapat ito ipatupad ang unified curfew pero posibleng ma-extend.
Nangangamba naman ang Employers' Confederation of the Philippines (ECOP) para sa mga manggagawang aabutin ng curfew sa kalsada.
Sabi ni ECOP president Sergio Ortiz-Luis Jr., umaasa silang magbibigay ng "pass" ang mga lokal na pamahalaan para sa mga manggagawang maaapektuhan ng curfew.
—Ulat ni Zyann Ambrosio, ABS-CBN News
Thursday, March 11, 2021
Lalaki patay sa pamamaril sa Quezon City
Dead-on-the-spot ang isang lalaki matapos siyang pagbabarilin sa Brgy. Sauyo, Quezon City Miyerkoles ng gabi.
May tama ng bala sa ulo ang 23-anyos na biktima na si Marvin Valencia.
Ayon sa mga residente sa lugar, nakarinig sila ng dalawang putok ng baril bago nakitang nakabulagta ang biktima sa eskinita. Wala naman makapagsabi kung ilan at kung sino ang nasa likod ng krimen.
Ayon sa nanay niya, nagkita pa sila sa isang computer shop noong gabing 'yon at pinauuwi na niya ito. Kaya laking gulat niya nang makitang nakahandusay at wala nang buhay ang kaniyang anak malapit sa kanilang bahay.
Palaisipan para sa pamilya ang motibo sa likod ng pamamaril, pero aminado silang dati nang nakulong ang biktima dahil sa droga.
Nakalap ng pulisya sa pinangyarihan ng krimen ang isang basyo ng bala sa lugar at isang sachet umano ng shabu na nasa kamay ng biktima.
https://news.abs-cbn.com/news/03/11/21/lalaki-patay-sa-pamamaril-sa-quezon-city